طاهر: تعلمت بالأهلي ألا ألتفت لتعليقات السوشيال ميديا.. وأقيّم نفسي بنفسي

موقع اخبار كورة - أكد طاهر محمد طاهر، لاعب النادي الأهلي، أنه يتقبل الانتقادات الفنية من الجماهير والمتابعين بكل رحابة صدر، لكنه يرفض تمامًا السخرية أو التقليل، مشيرًا إلى أن الجزء الذهني لديه أصبح أقوى بكثير بمرور الوقت، خصوصًا بعد الخبرات التي اكتسبها داخل القلعة الحمراء.

وقال طاهر محمد طاهر في تصريحاته تليفزيونية: "أتقبل الانتقاد مليون في المئة، ومن أي شخص، سواء كبير أو صغير أو حتى شخص لا أعرفه، لكن ما يضايقني هو السخرية والتريقة والحاجات اللي ملهاش علاقة بالكرة، فيه ناس ممكن ما تبقاش حباني لأي سبب، وبالتالي أي حاجة بعملها مش هيشوفوها بشكل عادل".

وأضاف: "زمان كنت بركز جدًا في كل تعليق بيتقال عليّا، سواء كويس أو وحش، خصوصًا في أول موسمين مع موسيماني، لكن اكتشفت إن ده مش له لازمة، بالعكس بيضايقني وبيضايق اللي حواليّ. اتعلمت في الأهلي إني أقيّم نفسي بنفسي بعد كل ماتش، وأكون أمين مع نفسي، لأني أنا الوحيد اللي فارق معاه يطور من مستواه".

وتحدث اللاعب عن فترات التراجع أو الابتعاد عن المشاركة، قائلاً: "لما بتجي إصابة أو أخرج من حسابات المدير الفني أو أكون مش في الفورمة، بيبدأ كلام مش فنّي، كلام يقلل من قدراتي لكن أنا عندي الجزء المنتاليتي قوي جدًا دايمًا بشغل نفسي بالتمرين والالتزام، والمدربين العادلين بيشوفوا ده ويدّوني حقي".

وأكد طاهر أنه لا يتأثر بالمنافسة داخل الفريق، قائلاً: "الأهلي مليان لعيبة كبيرة، ومش بخاف من المنافسة فيه لعيبة كتير جم في نفس مركزي ومشيوا، لكن أنا فضلت موجود الأهم إن كل مدرب يشوف مجهودي ويقدرني".

واختتم تصريحاته بالتأكيد على دعمه الدائم للفريق وحرصه على تقديم الأفضل دائمًا، مشيرًا إلى أن قوة الأهلي تأتي من العمل الجماعي والروح العالية داخل الفريق.